ЦХИНВАЛ, 29 авг — Sputnik. Цæгат Ирыстоны 24 сентябры æрбайгом уыдзысты 50 фæзуатæй фылдæр, цы ран айтынг уыдзысты республикæ æмæ йæ столицæ Дзæуджыхъæуы бонæн нывонд бæрæгбонон мадзæлттæ. Уый тыххæй фехъусын кодта горæты бынæттон хиуынаффæйады администрацийы пресс-службæ.
"Ӕнæхъæн бон Дзæуджыхъæуы Сабырдзинады проспект æмæ Хетæгкаты Къостайы номыл Централон парчы уагъд цæудзысты алыгъуызон фестивальтæ, концерттæ, армукъатæ, хъæзтытæ, конкурстæ æмæ равдысттæ", — дзырдæуы хъусинаджы.
Ацы бон Дзæуджыхъæуы цæрджытæ æмæ уазджытæм æнхъæлмæ кæсы хъæздыг программæ. Цæгатирыстойнаг столицæйы хицæуттæ хонынц курдиæтджын адæмы, модæйы, хæринаг аразыны, ирон уæлибыхты фестивальтæм. Боны дæргъы кусдзæн хæдбар æрмдæсныты армукъа "Хиконд" æмæ националон æхсæнадты фестиваль.
