ЦХИНВАЛ, 8 сен — Sputnik, Ӕлборты Александра. Фыццаг ӕхсӕнадӕмон IRON ROCK фестиваль ацӕудзӕн 23 сентябры Хуссар Ирыстоны.
Мадзал фадат ратдзӕн цӕрджытӕн ӕрмӕст хъӕлдзӕг рӕстӕг арвитын нӕ, фӕлӕ ма националон роким ӕбазонгӕ уӕвын – зарджытӕ иууылдӕр ӕххӕст цӕудзысты ирон ӕвзагыл.
Фестиваль уагъд ӕрцӕудзӕн Цхинвалы, Республикон стадионы.
Фестиваль уагъд ӕрцӕудзӕн зынгӕ ирон рок-группӕ "Бонвӕрноны" 45 азы юбилейы цытӕн, кӕцыйы музыкантты бон не ссис банысан кӕнын фарон.
"Ацы аз президент Бибылты Анатолийы ӕххуысӕй фӕнд кӕнӕм ауадзын фыццаг рок-фестиваль Цхинвалы", — загъта сфӕлдыстадон къорды солист Харебаты Вадим.
Группӕйы хайадисджытӕ фӕхуыдтой культурон мадзалмӕ сӕ зонгӕ музыкантты иууылдӕр иу домӕнимӕ – зарджытӕ иууылдӕр хъуамӕ ӕххӕст цӕуой мадӕлон ӕвзагыл.
Уый тыххӕй йыл сӕвӕрдтой ахӕм ном дӕр — IRON ROCK.
Фестивалы программӕмӕ Бонвӕрнонӕй дарддӕр бацыдысты ахӕм зарӕггӕнджытӕ, куыд Kroydon, Dzioff, Хъуылымбегты Сослан ӕмӕ ӕндӕртӕ.
Харебаты Вадим куыд банысан кодта, афтӕмӕй, фестивалы сӕйраг нысан у фӕсивӕды ӕрмӕст гъӕдджын рок-музыкӕмӕ ӕрбангом кӕнын нӕ, фӕлӕ ма сӕрмагондӕй ирон рокмӕ.
Фидӕны организаторты фӕнды ис ӕрхонын фестивальмӕ рок-музыкантты ӕндӕр бӕстӕтӕй дӕр – Цӕгат Ирыстонӕй, Абхазӕй, Донецк ӕмӕ Луганскӕй.
