ЦХИНВАЛ, 18 сен — Sputnik. Ирон дзюдоисттæ Тасойты Инал æмæ Таймæзты Мæдинæ рамбылдтой сыгъзæрин майдантæ Европæйы чемпионаты 21 азы онг кары спортсменты æхсæн, хъусын кæны Р-Спорт.
Тасойты Инал рамбылдта сыгъзæрин майдан 100 килограммæй уæлдæр уæзы категорийы, Таймæзты Мæдинæ та сыгъзæрин майдан чызджыты æхсæн 70 кг онг уæзы категорийы.
Индивидуалон ерысты фæстиуджытæм гæсгæ, уæрæсейаг дзюдоисттæ равдыстой хуыздæр хатдзæг — алы æмвæзады дæр фæйнæ æртæ майданы. Командон турниры фæстиуджытæм гæсгæ Уæрæсейы æмбырдгондæн ис Европæйы чемпионаты бронзæ майдан.
21 азы онг кары спортсменты æхсæн Европæйы чемпионат уагъд цыд спорткомплекс "Лукна"-йы аренæйыл Мариборы (Словени). Хайад дзы райстой 400 спортсменæйы фылдæр Европæйы 41 бæстæйæ.
