ЦХИНВАЛ, 26 сен — Sputnik. Хуссар Ирыстоны альпинисттæ схызтысты республикæйы иууыл бæрзонддæр хох Халацайы бæрзæндмæ. Сцыд снывонд кодтой Мидхъуыддæгты министрады сæрмагонд нысаниуæджы къорды (МСНК) хæсты зынгхуыст хъайтартæн æмæ къорды сывзæрды 25 азы юбилейæн, фехъусын кодта Sputnik балцы инициатор Багаты Марат.
"Къорд йæ балц райдыта 23 сентябры. Къуыдаргомы уæллаг Леты хъæумæ кæны хæрзвадат фæндаг æмæ уырдæм бацыдыстæм хæдтулгæйыл. Ацы комы æрæхсæвиуат кодтам Бестауты Балайы къæсы. Халацамæ сцыд райдыдтам райсом 5:15 сахатыл. Хорз боныгъæд нын скодта, фæссихорты схæццæ стæм нæ нысанмæ æмæ МСНК тырыса æрсагътам хохы цъуппыл", — загъта Багаты Марат.
Къорды сконды ма Багаты Маратæй дарддæр уыдысты Уанеты Эдуард, Джиоты Сослан, Уалыты Владислав æмæ Хъесаты Генрих.
Иуыл бӕрзонддӕр бынат Хуссар Ирыстоны — хох Халаца æвæрд у денджызы æмвæзадæй 3.938 метры бæрзæндæн.
