ЦХИНВАЛ, 27 сен — Sputnik, Козаты Диана. Хуссар Ирыстонæй 60 æрыгон адæймæгай фылдæр ацæудзысты Фæсивæд æмæ студентты æппæтдунейон фестивальмæ (ФСӔФ), кæцы ацæудзæн Сочийы 14-22 октябры.
Ӕртыццæджы Sputnik пресс-центры арæзт æрцыд видеохид, кæцы æрбаиу кодта Фæсивæд æмæ студентты æппæтдунейон фестивалы хайадисджыты Хусар Ир, Монголи æмæ Бурятийæ. Делегацитæ раздæр базонгæ сты кæрæдзиимæ, цыбыртæй радзырдтой сæ дарддæры æмгуыстады тыххæй.Фæсивæдон политикæ, спорт æмæ туризмы фæдыл комитеты республикон программæты хайады гæс Гатыгкоты Валентина радзырдта Sputnik, цæимæ цæуынц хуссарирыстойнаг фæсивæд фестивальмæ.
"Фестивалмæ цæуынц 60 хайадисæгæй фылдæр Хуссар Ирыстонæй. Уыдон сты курдиатджын, зæнджын фæсивæд, кæцыты цымыдис кæнынц алыгъуызон фæдыздæхттæ. Мах бафæлвардзыстæм равдисын фестивалы цы зонæм уый – нæ республикæ фенын кæнын иууыл хуыздæр фарсæй", — загъта Гатыгкоты Валентина.
Сæ балцы фæсивæдæн баххуыс кодта уый нымæцы Россотрудничествойы минæварад Хуссар Ирыстоны.
![Пресс-центр Пресс-центр - Sputnik Хуссар Ирыстон](https://cdnn1.img.sputnik-ossetia.ru/img/493/42/4934224_0:0:2500:1666_600x0_80_0_0_4be7cb90adc4555dc6e145cec3233096.jpg)
Гатыгкоты Валентина куыд банысан кодта, афтæмæй, фестиваль æрбамбырд кæндзæн 20 мин адæймаджы дунейы 150 бæстæйæ.
"Фестивалы программæ у тынг хъæзныг æмæ уæрæх. Уагъд дзы æрцæудзæн тынг бирæ алыгъуызон мадзæлттæ — дискуссион, культурон, спортивон программæтæ. Ис дзы зонадон фæдыздæхттæ дæр. Мах хъавæм уыдонæй алкæцыйы дæр хайад райсын", — загъта хуссарирыстойнаг минæвар.
Уый ма банысан кодта, Уæрæсейы территорийыл фестиваль афтæ уæрæхæй уагъд кæй цæуы дыккаг хатт æмæ бæстæйæн уый у тынг ахсджиаг мадзал, кæцымæ ис серьезон хъусдард.