ЦХИНВАЛ, 27 сен — Sputnik, Козаты Диана. Хуссар Ирыстоны столицæйы мэрия та радон хатт аргъæвта горӕтмӕ бацӕуӕны хуыздӕр эскизы фæдыл конкурс, радзырдтой Sputnik горæттаг администрацийы пресс-службæйы.
Фыццаг хатт конкурс расидт фарон раздæры мэр Ӕлборты Алан, уæд сæ куыстытæ æрбавдыстой 25 нывгæнæджы Хуссар æмæ Цæгат Ирыстонæй. Хуыздæр куыстытæ хъуамæ равзæрстаид сæрмагонд совет мэрияйы цур. Фæлæ столицæйы ног сæргълæууæг Коцты Алан банымадта, сæ хъуыды сæйраджыдæр кæй хъуамæ зæгъой горæты цæрджытæ сæхæдæг æмæ расидт ног конкурс.
"Дыууæ мæйы дæргъы мэриямæ сæ куыстытæ æрбавдыстой æрмæстдæр цалдæр авторы, уый æмрæстæджы табирæтæ фæрсынц æмæ курынц, цæмæй сын радтой чысыл фылдæр рæстæг проекттыл бакусынæн. Конкурсы хайад райсын кæй фæнды, уыдонæн ис рæстæг 1 ноябры онг, ома сын ис нырма иу мæй", — загъта мэрияйы пресс-секретарь Коцты Заринæ.
Уый зæрдыл æрлæууын кодта, сæйрагдæр хъусдард здæхт кæй цæудзæн националон колорит æвдисæг проекттæм.
Хуыздæр проекты автормæ æнхъæлмæ кæсы преми.
