ЦХИНВАЛ, 4 окт — Sputnik. Цæгат Ирыстоны сбæлвырд кодтой ирон бæгæныйы æхсæнадæмон фестивалы уæлахиздзауы, уый ссис Францы цæрæг Коцойты Зарифа. Хорзæхтæ раттыны церемони уагъд æрцыд Тæбæхсауты Балойы номыл Цæгат-Ирыстоны драмон театры сценæйыл. Бæрæгбонмæ фæуазæг республикæйы разамонæг Битарты Вячеслав, хъусын кæны Цæгат Ирыстоны хицауады пресс-службæ.
"Конкурс фыццаг хатт куы æрцыд уагъд, уæд уырнгæ дæр никæй кодта, ахæм популярон кæй суыдзæн æмæ йæ географи ахæм уæрæх кæй суыдзæн, куыд ацы аз. Абон мах уынæм, бæрæгбон æнтыстджынæй кæй ацыд æмæ дзы ис фылдæр минæвæрттæ Уæрæсейы горæттæй, ныр та паддзахадтæ дæр райдыдтой исын хайад ацы конкурсы. Ирон бæгæны ирæттæн æрмæст хуымæтæг нозт нæу – бæгæны æмæ æртæ уæлибыхимæ махæн вæййы не ′скуывд Дунескæнæгмæ", — загъта Битарты Вячеслав.
Фестиваль-конкурс уагъд цæуы Ирыстоны ныр цыппæрæм хатт. Хайад дзы райстой Хуссар Ирыстоны, Абхазы, Самарайы, Сочийы, Нальчикы, Мæскуыйы, Францы æмæ Турчы минæвæрттæ. Профессионалон жюри аргъ кодта æрмæст ирæтты традицион нозтæн нæ, фæлæ ма националон къæбицы хæринæгтæн дæр.
Дыккаг бынат адих кодтой Алагиры æмæ Ӕрыдоны районты бæгæныхсидджытæ Туаты Земфира æмæ Тебиты Дзирæт, æртыккаг бынат – Албегаты Кристина Горæтгæрон районæй, Хадыкъаты Сима Кировы районæй æмæ Битарты Фатимæ Дыгуры районæй.
