ЦХИНВАЛ, 16 окт — Sputnik, Плиты Фатимæ. Хуссарирыстойнаг боксертæ Тыбылты Алик æмæ Джиоты Вадим ссисты æхсæнадон–паддзахадон спортивон баиугонд "Юность России"-йы уæлахиздзаутæ, фехъусын кодта Sputnik боксертæй иуы тренер Чехойты Алан.
Ерыстæ цыдысты Курскы областы горæт Львовы 9-15 октябры. Ерысты архайдтой Цхинвалæй æртæ цæттæдæр боксеры, уыдон се ʻппæт дæр бацахстой призон бынæттæ.
"Тыбылты Алик æмæ Джиоты Вадим рамбылдтой фыццаг бынæттæ. Æртыккаг лæппу Кокойты Эдурад та ссис æвзист призер. "Юность России"-йы уæлахиздзаутæм ныр та æнхъæлмæ кæсынц бæрзонддæр æмвæзады ерыстæ — Уæрæсейы фыццагад", — загъта тренер.
Джиоты Вадим боксмæ бацыд æрмæст иу азы размæ, цæттæ йæ кæнынц тренертæ Чехойты Алан, Кокойты Мурат, Плиты Азæмæт æмæ Куымæридтаты Родион. Аннæ дыууæ боксеры — Кокойты Эдуард æмæ Тыбылты Алик спортмæ цæуынц фылдæр рæстæг, семæ кусынц тренертæ Тедеты Алик æмæ Бестауты Чермен.
