Цæлыкъаты Вадим радзырдта йæ ног фильм "Алыбег"-ы тыххæй

Рафыссын
Мæскуыйы равдисдзысты Цæлыкъаты Вадимы ног фильм "Алыбег", режиссер радзырдта, куыд райгуырд фильмы хъуыды æмæ ууыл куысты тыххæй

ЦХИНВАЛ, 16 окт — Sputnik, Къæбысты Анна. Бæхджын циркон аивады легендæ Хъантемыраты Алыбегæн нывонд документалон фильм "Алыбег"-ы премьерæ фенын кæндзысты 20 октябры Мæскуыйы Александры Солженицыны номыл Уырыссаг фæсарæнты хæдзары. 

Йæ ног фильмы тыххæй йæ интервью Sputnik режиссер Цæлыкъаты Вадим.

Хъантемыраты Мухтарбег - Sputnik Хуссар Ирыстон
Йæ цардæй ахицæн Хъантемыраты Мухтарбег

"Бæхджын циркон аивады легендæ Хъантемыраты Алыбегæн нывонд фильм сисыныл мах уынаффæ кодтам 1998 азы йæ лæппу Ирбегимæ. Фæлæ уæды рæстæджы нæ разынд фæрæзтæ йæ реализацийæн. Уый фæстæ фæхъуыд Ирбег, æз та куыстон æндæр документалон проекттыл: "Прощай, Асуан", "Гладиаторы нашего времени" – уыдон дæр уыдысты нывонд Хъантемыраты труппæйæн. Ӕмæ нын æрмæстдæр ацы азы райдианы бантыст æрæвналын фильм исынмæ Уæрæсейы Федерацийы культурæйы министрады æххуысæй", — загъта режиссер.

Уый зæрдыл æрлæууын кодта, ацы аз кæй сæххæст 110 азы Хъантемыраты Алыбег Батумаг цирчы манежмæ рахызтыл.

"Уый юбилейон фильм нæу, фæлæ фильм-портрет нæ бæстæйы циркон джигитовкæ чи сарæзта, уыцы адæймаджы вазыгджын хъысмæтыл. Хъыгагæн, нæ фæсивæд афтæ хорз нал зоны легендарон труппæйæн цы роль æмæ нысаниуæг уыд раздæр æзты, уый тыххæй. Хъантемыраты Алыбег æмæ йæ фырттæн къухæмдзæгъд кодтой æрмæст Ирыстоны нæ, фæлæ дунейы бирæ циркты. Афтæмæй та сæ триумфалон цыд райдыдта 20-æм æнусты райдианы", — банысан кодта Цæлыкъаты Вадим.

Режиссеры ныхæстæм гæсгæ, уый бафæлвæрдта фильмы равдисын Хъантемыраты Алыбеджы сфæлдыстадон архайды æрмæст алкæмæндæр зонгæ факттæ нæ, фæлæ ма æнæзонгæ цаутæ дæр.

Цæлыкъаты Вадим райгуырд 1966 азы Пятигорскы. 1989 азы каст фæцис Дзæуджыхъæуы аивадон ахуыргæнæндоны. Ахуыр кодта Санкт-Петербургаг аивæдты академийы истори æмæ теорийы факультеты. У уæрæсейаг æмæ æхæснадæмон фестивальты призер. У Уæрæсейы Кинематографистты цæдисы уæнг. Цæры Мæскуыйы.

Ног хабӕртты лентӕ
0