ЦХИНВАЛ, 16 окт — Sputnik, Годжысаты Анна. Хуссарирыстойнаг делегацийы минæвар, студенткæ Джиоты Люба нымайы, ахæм æмвæзады фестивалы фæрцы хайадиджытæ кæй райсдзысты бирæ зонындзинæдтæ, зонгæдзинæдтæ æмæ позитивон æнкъарæнтæ.
"Кæд æмæ фестивалы æрбайгомы церемонимæ зын бахауæн уыд, уæддæр нæ делегаци иууылдæр уыд Ихджын галуаны. Ныртæккæ махæн уагъд цæуынц лекцитæ æмæ семинартæ, фембæлдтæ алыгъуызон зындгонд адæмимæ. Дыууæ бонмæ мах схæлар стæм фæсивæды минæвæрттимæ æндæр æмæ æндæр бæстæтæй, базыдтам бирæ цымыдисонæй æмæ райстам позитивон æнкъарæнтæ", — радзырдта Люба.
Джиоты Люба ма радзырдта, Олимпиаг горæты кæй ис æдасдзинады беспрецедентон мадзæлттæ.
"Олимпиаг горæт у тынг стыр, лекцитæм цæуын хъæуы автобустыл. Мах бафæллайæм, фæлæ дзы тынг нæ зæрдæмæ цæуы, фæнды нæ райсын хайад алы мадзалы дæр. Махæй райгонд сты", — дзуры Люба.