ЦХИНВАЛ, 16 окт — Sputnik, Плиты Фатимæ. Хуссар Ирыстоны æмырдгонд командæ бацахста æртыккаг бынат æппæтуæрæсейон культурон-спортивон фестиваль "Сабырадон Кавказ"-ы. Уæрæсейы бирæнымæц командæты ʻхсæн цхинвайлаг командæйы æртыккаг бынатмæ ракодтой æрыгон каратисттæ æмæ самбисттæ, фехъусын кодта Sputnik спортсменты тренертæй иу Беджызаты Гия.
Хуссар Ирыстоны спортивон кад фестивалы хъахъхъæдтой киокусин-кан каратейы секцийы хъомылгӕнинæгтæ æмæ Дзауы раойны Сиукъаты Темойы номыл хъæбысхæсты скъолайы самбойы секцийы минæвæрттæ.
"Фондз самбисты архайдтой Дзауы скъолайы секцийæ. Тедеты Гæмæт 66 кг уæзы финалмæ хизгæйæ ныббырста "Юность России"-йы уæлахиздзауы, басаста финалы ныхмæлæууæджы дæр. 78 кг уæзы нæ дыууæ хъомылгæнинаджы ссисты призертæ, дыккаг бынат бацахста Тедеты Марат, æртыккаг та ссис Джиоты Тамерлан. Нæ самбистты æнтыстытæ æмæ цхинвайлаг каратистты архайд Хуссар Иры командæ скодтой фестивалы æртыккаг бынатмæ", — загъта самбойы тренер Беджызаты Гия.
Иумæйаг командæйон бæрæггæнæнтæм гæсгæ фыццаг банат бацахстой фысымтæ сæхæдæг, дыккаг бынатыл ацыд Цæцæны республикæ æмæ æртыккаг та ссис Хуссар Иры æмбырдгонд. Командæйы æнтысты стыр хайбавæрд уыд Киокусин-кан каратейы секцийы хъомылгæнинæгтæн, уыдон æрхастой фондз майданы.
"Радон хатт та сæ фарсхæцджыты зæрдæтæ барухс кодтой Тедеты Анна æмæ Дудайты Донна, уыдон ссисты уæлахиздзаутæ. Тадтаты Роман æмæ Гаглойты Диана бацахстой дыккаг бынæттæ, фæндзæм — бронзæ майдан та райста Тадтаты София", — загътой Киокусин-кан каратейы федерацийы пресс-службæйы.
Дзауы самбойы командæ ацыд районы къухдариуæггæнæджы финансон æххуысы фæрцы, каратисттæ абалц сты ныййарджыты хæрдзтæй.
Дзæуджыхъæуы уагъд цæуæг æппæтуæрæсейон культурон-спортивон фестиваль "Сабырадон Кавказ"-ы архайдтой иу мин æмæ фондз сæдæ адæймаджы 8-16 азы кары онг. Фестиваль ацыд ныр æвдæм хатт, хайад дзы истой Цæгат Кавказы æппæт республикæтæ.
