ЦХИНВАЛ, 26 окт – Sputnik, Босыкты Наталья. Хисæрмагонд асфальтон завод скуыста æрæджы Хуссар Ирыстоны столицæйы, иу сменæмæ куыстуатæн ис 300 тонн продукци уадзыны хъомыс. Куыстуаты хистæр Цоциты Сослан радзырдта Sputnik ног завод æмæ йæ ахадæнты тыххæй.
Хисæрмагонд завод кусы бадзырдон бындурыл паддзахадон куыстуат "Дорэкспостпрой"-имæ (аразы бынæттон фæндæгтæ).
Цоцийы фырты ныхæстæм гæсгæ, заводы ахадæнтæ фадат дæттынц асфальт лыстæг куыстытæн уадзын – дзыхъхъытæ æмæ тротуартæ асфальт кæнынæн.
"Мах кусæм бадзырдмæ гæсгæ "Дорэкспострой"-имæ, уыдон нын рахицæн кæнынц объект, кæдæм ныридæгæн ласæм асфальт. Кондады ахæм гуырахстимæ завод у пайда дзыхъхъытæ æмæ тротуартæ асфальтæй æмбæрзынæн. Нæ куыстуатæн ис фадат куысты сменæмæ 300 тонн асфальт уадзын, фактон æгъдауæй та мах уадзæм 100-200 тон – заказмæ гæсгæ", — радзырдта амалиуæггæнæг.
Амалиуæггæнæджы ныхæстæм гæсгæ, асфальтон кондад у сезонон куыст. Кондады гуырахст хынцгæйæ, куыстуатæн ис кусджыты чысыл штат æмæ æрвылбон нæ кусы. Завод эксплуатацимæ раттыны размæ уыд бирæ зындзинæдтæ, фæлæ уыдонмæ æнæкæсгæйæ æмæ паддзахады сæргълæууæджы æххуысæй, заводæн бантыст скусын кæнын.
"Ӕххæстбæрцæй завод скуыста мæйы размæ. Арæзтам æй нæхи фæрæзтæй. Фыццаг мæм афтæ каст, æнцон уыдзæн, зæгъгæ, уымæн æмæ нæм уыд тырнынад, фæлæ хъуыддаджы алцы афтæ æнцон нæ разынд, фæзынд зындзинæдтæ. Махæн бантыст уыдон аиуварс кæнын паддзахады сæргълæууæджы æххуысæй", — загъта Цоциты Сослан.
Куыстуат нывæнды базарады стабилон бынат бацахсын. Цоциты Сослан у æнæдызæрдыг, бирæ цæлхдуртæм æнæкæсгæйæ, куыстуат кæй тырндзæн æнтыстытæм æмæ ссардзæн "йæхи бынат".
