ЦХИНВАЛ, 30 окт — Sputnik, Годжысаты Анна. Паддзахадон хъахъхъæнынады рæнхъытæ цы курсанттæ баххæст кодтой, уыдон райстой ардбахæрд Кады аллейы Цхинвалы. Ардбахæрд райсыны официалон церемонийы райстой хайад Хуссар Ирыстоны президент Бибылты Анатолий, УУМ-ы сæргълæууæг Тадтаты Алан, мидхъуыддæгты министр Наниты Игорь, афтæ ма паддзахадон æдасдзинады комитеты сæргълæууæг Михаил Шабанов æмæ бæстæйы хъахъхъæнынады министрады къухдариуæгад, фехъусын кодта президенты пресс-службæ.
"Ирæттæ кæдфæндыдæр хицæн кодтой службæ хæссыны рæстæджы – сæ æхсар æмæ хъæбатырдзинадæй. Абон сымах райстат ардбахæрд, уыдон хуымæтæг ныхæстæ не ′сты – сымах ард хæруд уæ фыдыбæстæйæн, уæ адæмæн, сомы кæнут бæрзæндты хæссын ирон фыдыбæстæ хъахъхъæнæджы кад. Нæ дызæрдыг кæнын, сымах абон кæй æрлæууыдыстут уæ фыдыбæстæ, уæ адæмæн лæггад кæнын фæндагыл. Арфæ уын кæнын æмæ Дунескæнæг уемæ!" – загъта президент.
Хъахъхъæнынады паддзахадон службæйы сæргълæууæг Бибылты Ацæмæз банысан кодта, зæгъгæ ардбахæрд цы 23 курсанты райстой, уыдон ныридæгæн службæ кæй хæссынц хъахъхъæнынады паддзахадон службæйы рæнхъыты.
"Лæппутæ ныры онг дæр хастой службæ хъахъхъæнынады паддзахадон службæйы, фæлæ райст æрцыдысты æнæ ард бахæрдæй, уый та у æнæрайсинаг ахæм структурæйæн. Уый тыххæй мах аскъуыддзаг кодтам уыдон Хъахъхъæнынады министрады дæлбар ахуырадон центр "Барс"-мæ арвитын, цæмæй цыппар къуыри сæхи бацæттæ кæной ард бахæрынмæ", — фехъусын кодта уый.
Церемони балхынцъ республикæ Хуссар Ирыстоны Паддзахадон гимны сæххæст æмæ цытджын маршæй.
