ЦХИНВАЛ, 6 ноя — Sputnik, Козаты Диана. Адæмон иудзинады бонмæ президент Бибылты Анатолий схорзæхджын кодта Роострудничествойы сæргълæууæджы республикæйы, Зонад æмæ культурæйы уæрæсейаг центры директор, уæрæсейаг минæварады уынаффæгæнæг Михаил Степановы Хæлардзинады орденæй, фехъусын кодтой президенты пресс-службæйы.
Уæлдæр хорзæх Степанов райста "йе стыр лæггæдты тыххæй адæмты æхсæн хæларадон ахастытæ фидар кæныны, уырыссаг æвзаг, культурæ æмæ ахуырады популяризацийы, афтæ ма Республикæ Хуссар Ирыстоны территорийыл зонадон æмæ культурон акцитæ уадзынмæ хисæрмагонд хайбавæрды тыххæй".
Хуссар Ирыстоны президенты къухæй ма хорзæх райста Россотрудничествойы къухдариуæггæнæджы цардæмбал Нина Степанова — Россотрудничествойы административон-хæдзарадон архайды фæдыл хистæр референт.
"Россотрудничество" архайы Хуссар Ирыстоны 2010 азы 6 сентябрæй. Йæ хæслæвæрдтæм хауынц Уæрæсе æмæ Хуссар Ирыстоны æхсæн культурон, гуманитарон, ахуырадон, зонадон-техникон æмæ информацион ахастыты райрæзт.
