ЦХИНВАЛ, 7 ноя — Sputnik, Козаты Диана. Хуссарирыстойнаг каратисткæ Дудайты Донна ссис кекусин-кан каратейæ Уæрæсейы фыццагады уæлахиздзау. Ноджы ма иу архайæг Цхинвалæй – Гаглойты Диана – бацахста æртыккаг бынат.
Sputnik пресс-центры спортсменкæтæ æмæ сæ тренер Созаты Владимир радзырдтой, куыд цæттæ кодтой чызджытæ сæхи ерыстæм, фыццаг тæлмæнты тыххæй, афтæ ма ауагътой мастер-класс киокусин-кан каратэйæ.
Тренеры ныхæстæм гæсгæ, ерыстæ уагъд цыдысты юниортæ æмæ юниоркæты æхсæн æртæ кары группæйы. Хуссарирыстойнаг чызджытæ архайдтой 12-13 азы кары къорды. Ӕдæппæт ерысты истой хайад 480 адæймаджы Уæрæсейы 20 регионæй.
"Уæрæсейы фыццагады хайадисты размæ мах рацыдыстæм цалдæр турниры – ЦКФЗ-ы, Цæгат Ирыстоны фыццагадтæ, турнир "Сабыр Кавказ", Уæрæсейы Кубок. Уыдонæй алкæцыйы дæр, Уæрæсейы кубокæй дарддæр, Донна рахызт уæлахиздауæй, Диана та бацахста дыккаг бынæттæ", — загъта Созаты Владимир.
Тренер банысан кодта, фыццагады чызджытæ кæй райдыдтой тынг хорз, развæлгъау тохты уыдысты тыхджындæр, финалы цыппæрæм хайы тохтæ та балхынцъ кодтой æмгъуыдæй раздæр.
"Финалмæ ахизыны тыххæй тохы Диана уыд арæхстджындæр, фæлæ бауагъта рæдыд – æркъул кодта йæ сæр. Ацы тæссаг фезмæлд ныхмæлæууæджы æрдæм æфхæрд цæуы бафæдзæхстæй, фæдзæхст та у вазари, ома æрдæг уæлахиз. Рамбулынæн рæстæг нал баззад æмæ Дианайæн банымадтой фæхæрд. Æртыккаг бынатыл тохмæ уый йæхи хорз бацæттæ кодта æмæ рамбылдта… Кæй зæгъын æй хъæуы, йæ бынат финалы уыд, фæлæ…", — радзырдта тренер æмæ бафтыдты, ацы рæдыдтытыл радон тренировкæтыл кæй бакусдзысты.
Уый загъта, кæй у райгонд фæ хъомылгæнинæгты æнтыстæй æмæ банысан кодта, чызджыты удуæлдай тренировкæтæ сæрдыгон рæстæг (уæлдæфы хъæрмад 40 градусмæ куы хызт) — кæй нæ ацыдысты æнæпайдайæ.
