ЦХИНВАЛ, 8 ноя — Sputnik. Дзӕуджыхъӕуы уагъд ӕрцыд II Алайнаг националон конкурс "Ӕз — Аланка-2017"-ы финал. Мадзалы организаторӕй ралӕууыд компани "Суардон", хъусын кӕны 15-й Регион.
"Конкурсы сӕйраг нысан — алкӕцы хайадисӕгӕн дӕр раттын фадат йӕ фыдӕлты историйы аныгъуылын. Уымӕй дарддӕр ма алы чызг дӕр хъуамӕ радзырдтаит, къамтӕ цы бынаты систа, уый тыххӕй, науӕд та сӕ мыггаджы мӕсгуыты истори", — радзырдта компани "Суардон"-ы минӕвар Аслан Николов.
Мадзалы организатортӕ ма сарӕзтой акцент сакралон нымӕц 7-ыл, кӕцы ӕмбӕлы бирӕ алайнаг ӕмӕ ирон ритуалты.
7 номинацийы, 7 къамы, жюрийы 7 уӕнджы, 7 ноябрь — конкурсы райдиан, 7 июлы — куырдиӕттӕ исыны фӕуд, хъӕлӕскӕнынады старт, 7 август — сайтыл хъӕлӕскӕнынады фӕуд ӕмӕ та 7 ноябры — финал.
"Конкурсанткӕтӕ иууылдӕр сты рӕсугъд, иууылдӕр иттӕг хорз бацӕттӕ кодтой, фӕлӕ мах сфӕнд кодтам, цӕмӕй уӕлахиздзауы рабӕрӕг кӕной цифрӕтӕ", — банысан кодта жюрийы уӕнг, бренд "Суардон"-ы бындурӕвӕрӕг Къорнаты Анзор.
Жюри сӕвӕрдта баллтӕ, уыдоны суммӕ сбӕрӕг кодта "Аланка-2017". Уӕлахиздзау ссис Къараты Аланӕ. Дыккаг бынат схӕлар кодтой Дзаллаты Алинайӕн, ӕртыккаг та — Хъайтыхты Фатимӕйӕн.
