ЦХИНВАЛ, 8 ноя — Sputnik. Хуссарирыстойнаг гимнасткæтæ рамбылдтой цыппар сыгъзæрин майданы аивадон гимнастикæйæ ерыстæ "Хæххон Зæрватыкк"-ы, кæцытæ ацыдысты Нальчикы, фехъусын кодта Sputnik Хуссар Ирыстоны гимнастикæйы федерацийы президент Цхуырбаты Зема.
"Аивадон гимнастикæйæ ерыстæ уагъд цыдысты 6-7 ноябры Нальчикы æндæр æмæ æндæр кары къордты. Ерысты рæстæджы куыд банысан кодтой, афтæмæй нæ гимнасткæтæн уыд иууыл сыгъдæгдæр техникæ", — загъта Цхуырбаты Зема.
Индивидуалон композицитимæ гимнасткæты бацæттæ кодтой уæлдæр категорийы тренер Дзæуджыхъæуæй Инна Никитина æмæ Федерацийы президент Цхуырбаты Зема.
Йæ ныхæстæм гæсгæ, ерысты хайад истой 200 гимнасткæйы Цæгат Кавказаг республикæтæй.
"Нæ спортсменкæтæ рамбылдтой цыппар сыгъзæрин, иу æвзист æмæ иу бронзæ майданы. Нæ уыдтæн уый æнхъæл æмæ нын ссис æхсызгон сюрприз, кæцы нæ сразæнгард кодта дарддæры æнтыстытæ æмæ уæлахизтæм", — загъта Цхуырбаты Зема.
Разæй та сæм æнхъæлмæ кæсынц ерыстæ Санкт-Петербурджы, кæцытæ ацæудзысты ноябры кæрон.
