ЦХИНВАЛ, 10 ноя — Sputnik, Плиты Фатимæ. Милицийы 100 азы юбилейы цытæн Цхинвалы ацыд цытджын рабат. Барадхъахъхъæнæг органты къорд кусæджы хорзæхджын æрцыдыдысты паддзахадон æмæ ведомствæйон майдантæй, афтæ ма райстой сæрмагонд цинтæ.
ПККЗ "Чермен"-ы барадхъахъхъæнæг органты кусджытæн раарфæ кодта республикæйы мидхъуыддæгты министр Наниты Игорь. Уый зæрдыл æрæууын кодта ведомствæйы кусджыты хицæн сгуыхтдзинæдтæ æмæ хъæбатырдзинад Хуссар Ирыстоны 1989-2008 азты хæстон архæйдтыты рæстæджы.
"Министрады кусджытæй 20 сты бæстæйы уæлдæр æфсæддон хорзæх — орден "Уацамонгæ"-йы кавалертæ, уыдонæй 7 сæ хорзæхтæ райстой сæ амæлæты фæстæ. Абон дæр барадхъахъхъæнæг органтæ архайынц сабырдзинад бахъахъхъæныныл", — загъта Наниты Игорь.
Уый ма банысан кодта йæ раныхасы, министрады къухдариуæгады нывæзты кæй ис саразын реформæтæ, кæцытæ бандавдзысты æвæрццагæй куысты гъæдыл.
"Афтæ ма ногдзинæдтæ фæбæрзонддæр кæндзысты адæмы æууæнк милицимæ. Хорз фæстиуджытæ ис уæрæсейаг коллегатимæ æмгуыстадæн дæр", — бафтыдта министр.
Бæрæгбоны цытæн Хуссар Ирыстоны бардхъахъхъæнæг органтæн раарфæ кодта паддзахады сæргълæууæг Бибылты Анатолий дæр. Уый банысан кодта, милицийы кусджыты профессионалондзинады æвдисæн сæрды кæй уыд уайтагъд адæймаджы адавыны цау раиртасын.
"Сæйраг уыл адæм хъуамæ æууæндой. Сымах стут æдасдзинад æмæ сабырдзинады гаранттæ республикæйы мидæг. Уæ куыст у тынг ахсджиаг цæрджытæн, уырны мæ, уæ профессионализм æмæ уæ хорз ахасты фæрцы сымах ацы хæс намысджынæй кæй æххæст кæндзыстут", — загъта президент.
Къорд æмкусæджы хорзæхджын æрцыдысты майдантæ "Защитник Отечества", "За службу на страже мира" æмæ " 25 лет Республике"-йæ, афтæ ма МХМ ведомствæйон хорзæхтæй. Цытджын мадзал адарддæр бæрæгбонон концертæй.
