ЦХИНВАЛ, 20 ноя — Sputnik. Хуссар Ирыстоны президент Бибылты Анатолий радта Национ музеймæ Уæрæсейы президент Владимир Путины лæвæрттæ – хъазахъхъон булкъон Тускъаты Александры XVIII æнусы схонон хæцæнгарз æмæ паддзахы æфсады инæлар-лейтенант Хæбæлаты Сергейы XIX æнусы æхсаргард.
Тускъаты Александры хæцæнгарз Путин балæвар кодта президент Тыбылты Леонидæн 2015 азы йæ фæстаг официалон визиты рæстæджы Уæрæсемæ. Инæлар-лейтенант Хæбæлаты Сергейы æхсаргард та уæрæсейаг лидер балæвар кодта Бибылты Анатолийæн йæ æрæджыйы официалон визиты рæстæджы Мæскуымæ.
Экспонаттæ музейы директор Зассеты Мерабы къухтæм дæтгæйæ, Бибылты Анатолий бахахх кодта, уыдон сæрмагондæй уымæн лæвар кæй нæ уыдысты, фæлæ иумæйагæй Хуссар Ирыстонæн, "уымæ гæсгæ растдæр уаид уыдон музеймæ раттын, цæмæй кæй фæнды, уымæн уа сæ фенын æмæ базонын ирон æфсæддон службæгæнджыты æмæ сæ хъæбатырдзинæдты тыххæй".
Зассеты Мераб бузныг загъта президентæн зынаргъ экспонатты тыххæй æмæ банысан кодта, уыдон кæй бацахсдзысты æмбæлон бынат музейы.
