ЦХИНВАЛ, 24 ноя — Sputnik, Плиты Фатима. Хуссар Ирыстоны президент Бибылты Анатолий балӕвар кодта тренер Цхуырбаты Вадимы волейболисткӕты командӕйӕн спортивон ифтонгад. Ног дарӕс ӕмӕ ног фӕндтимӕ командӕ йӕхи цӕттӕ кӕны ерыстӕм.
Хуссар Ирыстоны спорты комитеты финансон авналӕнтӕ сты къуындӕг, уымӕ гӕсгӕ тренерты сӕ хъомылгӕнинӕгтӕ ерыстӕм акӕныны тыххӕй бахъӕуы спонсортӕ агурын – бахатынц бизнесментӕ ӕмӕ политиктӕм. Цхуырбаты Вадим йӕ командӕ ерыстӕм акӕнынӕн ныффыста фыстӕг президенты номыл ӕмӕ канд балцӕг сӕ къухы нӕ бафтыд, фӕлӕ ма райстой уӕлӕмхас лӕвар дӕр.
"Дзӕуджыхъӕумӕ кодтон мӕ чызджыты командӕ ӕмӕ ныффыстон президентмӕ фыстӕг, цӕмӕй нын ацӕуынӕн баххуыс кӕна. Ерысты систӕм дыккӕгтӕ, уый фӕстӕ президент йӕхӕдӕг банхъардта командӕйӕн истӕймӕй баххуыс кӕнын, афтӕмӕй чызджытӕ формӕйы хицау баисты ", — загъта Цхуырбаты Вадим.
Тренер ма радзырдта, рӕхджы командӕйы хъуамӕ акӕна Дзӕуджыхъӕумӕ ног ерыстӕм, ӕмӕ сыл ныр ис стырдӕр бӕрндзинад.
"29 ноябры Дзӕуджыхъӕуы сархайдзыстӕм ерысты. Ахӕм лӕггады фӕстӕ ныл ис стырдӕр бӕрн ӕмӕ тӕссаг у мидтыхст чызджытыл куы фӕтых уа", — дзуры уый.
Тренер Цхуырбаты Вадим цӕттӕ кӕны фӕсивӕды Цхинвалы 6-ӕм скъолайы бӕстыхайы спортивон залы. Волейболисткӕтӕ дих сты дыууӕ къордыл.
