ЦХИНВАЛ, 5 дек — Sputnik, Уалыты Диана. Диссаджы бӕрӕгбон – Мады бон – банысан кодтой Цхинвалы цытджын концертӕй. Мадзалмӕ ӕрбацыдысты хицауады сӕрдар Пухаты Эрик ӕмӕ ахуырады министр Гасситы Натали. Уыдон раарфӕ кодтой ныййарджытӕн сӕ бӕрӕгбоны цытӕн ӕмӕ сын загътой бузныг сӕ ахсджиаг куысты тыххӕй.
Пухаты Эрик ма бузныг загъта ахуырады министрадæн концерт саразыны тыххæй æмæ радзырдта, 2018 азы цы ногдзинæдтæ æнхъæлмæ кæсынц ныййарджытæм.
"Арфæ уын кæнын ныййарæджы боны фæдыл. Президент æмæ парламент та араздзысты æппæт дæр сабитæ цы бинонты ис, уыдон цард фæхуыздæр кæнынæн. Хицауад цæттæ кæны къорд документы, кæцытæ бандавдзысты фыццаг сывæллоны райгуырды фæдыл иухаттон фиддонты æмæ æрвылмæйон сабиты фиддонтыл", — загъта уый.
Концерты скъолаты ахуырдзаутæ сæххæст кодтой ныййарæгæн нывонд номыртæ. Алкæцы скъола дæр радзырдта, сæ ахуырадон уагдоны кæй цот ахуыр кæнынц, ахæм сгуыхт ныййарджыты тыххæй.
Мадзалы кæрон ма ныййарджытæн иу хатт раарфæ кодтой æмæ сын балæвар кодтой дидинтæ.
