ЦХИНВАЛ, 7 дек — Sputnik, Козаты Диана. Тасойты Дмитрийы депутатон мандат радтой Хуссар Ирыстоны Адӕмон артист Уанеты Ӕхсарӕн.
Тасойты Дмитрийы мандат ссӕрибар ис октябры, уымӕн ӕмгъуыдӕй раздӕр йе ‘ххӕстбартӕ куы ӕрурӕдтой, уӕд.
Вакантон мандат парламенты ӕхсӕзӕм ӕрсидты парламенты депутаттӕм "Иугонд Ирыстон"-ӕй регистрацигонд кандидатӕн раттыныл депутаттӕ сразы сты ӕмхъӕлӕсӕй.
Уанеты Ӕхсар у хуссарирыстойнаг театры ирддӕр актертӕй иу. Актерон кустӕй дарддӕр ма уый сӕвӕрдта сценӕйыл дӕс спектаклӕй фылдӕр. Къухдариуӕгад ма кӕны Цхинвалы районы адӕмон театрӕн дӕр.
Айразмӕ ма Тасойты Дмитрий сӕрибар ӕрцыд вице-спикер ӕмӕ хъахъхъӕнынад ӕмӕ ӕдасдзинады фӕдыл парламентон комитеты сӕргълӕууӕджы бынӕттӕй дӕр.
