ЦХИНВАЛ 27 дек— Sputnik, Козаты Диана. Дон Хуссар Ирыстон рæстæгмæ исдзæн æххуысгæнæг доныхæтæл Брытъат-Цхинвалæй, цалынмæ бындурон доны хæтæл Едыс-Цхинвал не ′скуса æрвылбонон режимы, загътой Sputnik Цхинвалы мэрияйы пресс-службæйы.
Донифтонгад горæты фехæлд сабаты. Дзомагъы донæмбырдгæнæн тынг кæй счъизи ис хуылыдз мит æмæ къæвдаты тыххæй, уый тыххæй уал æй æрæхгæдтой.
"Знон изæр "Водоканал"-ы кусджытæ рауагътой горæтмæ дон Брытъат-Цхинвалы хаххыл. Горæты резервуартæ байдзаг сты æмæ горæты цæрджытæ иууылдæр райстой дон. Ацафон ацы доныхæтæл дæр чъизи вæййы, фæлæ уал нырма дон бындурон хæтæлыл нæй фадат рауадзын", — загътой пресс-службæйы.
Мэрияйы ма бафтыдтой, куыстуаты кусджытæ кæй дарынц уавæр сæ контролы бын, æмæ куыддæр Дзомагъæй цы дон исæм, уый расыгъдæг уа, афтæ горæты дон фæзындзæн æххæст бæрцæй.
