ЦХИНВАЛ, 17 янв— Sputnik. Рæстæгмæдарæн изоляторы (РДИ) ахæстытæ Цхинвалы æрлæууын кодтой нæхæрын, фехъусын кодтой Sputnik Хуссар Ирыстоны МХМ-ы.
Цхинвайлаг рæстæгмæдарæн изоляторы ахæстытæ расидтысты нæхæрын 13 январы.
МХМ-ы радзырдтой, ныртæккæ изоляторы уавæр кæй рарæстмæ ис.
"Ахæстытæ исынц хæрд æмæ æрвитæггæгтæ сæ хиуæттæй. Ахæстытæй иу – Джиотæй, кæцы арæх фæлæууы барадхъахъхъæнæг органты кусджыты ныхмæ æмæ кæцы расидт нæхæрын, уый дæр ныууагъта йæ нæхæрын", — загътой МХМ-ы.
Агентады дзырдæмбалы ныхæстæм гæсгæ, Джиойы фырты ракæндзысты рæстæгмæдарæн изоляторæй рæстмæгæнæн колонимæ.
"РДИ-ы ахæстыты нымæц у бынæттæй фылдæр. Уымæй раддæр ма РДИ-мæ бахауынц административон фыдракæндтæ чи саразы, уыдон. Джиойы фырт та бады давыны тыххæй, уымæ гæсгæ йæ æртыццæджы ракæндзысты рæстмæгæнæн колонимæ", — банысан кодтой ведомствæйы.
Уыимæ иумæ Джиойы фырты хæстæджытæ дзурынц, изоляторы нæхæрын нырма кæй не ′рлæууыд.
Ахæстытæм бацыд адæймаджы барты фæдыл æххæстбарджын Тасойты Инал.
