ЦХИНВАЛ, 18 янв— Sputnik. Хуссар Ирыстоны президенты администрацийы цур арæзт æрцыд кусæгон къорд республикæйы территорийыл УФ-йы президенты æвзæрстытæ ауадзыны фæдыл. Цыппæрæмы кусæгон къорд ауагъта фыццаг рабадт, хъусын кæны Хуссар Ирыстоны ФХМ-ы пресс-службæ.
Президентон æвзæрстытæ Уæрæсейы ацæудзысты 2018 азы 18 марты. Ӕдæппæт РХИ территорийыл арæзт æрцæудзæн фараст æвзарæн фадыджы, уыдонæй фондз æрбайгом уыдзысты Цхинвалы, иннæтæ та – Знауыры æмæ Дзауы районы администрациты, Ленингоры поселок æмæ Дменисы хъæуы.
"Кусæгон къорды уæнгтæ æруынаффæ кодтой организацион фарстытыл – Уæрæсейы минæварадæн Хуссар Ирыстоны баххуыс кæнын РХИ-ы территорийыл УФ-йы президенты æвзæрстытæ ауадзын", — банысан кодтой ФХМ-ы.
Кусæгон къорды къухдариуæггæнæг у фæсарæйнаг хъуыддæгты министр Медойты Дмитрий. Афтæ ма йе скондмæ бацыдысты президентон администрацийы сæргълæууæджы хæдивæг Пухаты Константин, Хуссар Ирыстоны Центрæвзæрсткъамы сæргълæууæг Плиты Белла æмæ мидæггагон политикæйы фæдыл управленийы сæргълæууæг Уанеты Мурæт.
