ЦХИНВАЛ, 29 янв— Sputnik, Козаты Диана. Хуссар Ирыстоны МХМ-ы кусджытæ æрцахстой Дзауы районы Къуайсайы 31-аздзыд цæрæджы, кæцыйы машинæйы ссардтой егъау парти гæн, фехъусын кодтой ведомствæйы пресс-службæйы.
МХМ-ы куыд загътой, афтæмæй мидхъуыддæгты министрады Дзауы районон управленийы кусджытæ милицийы сæрмагонд нысаниуæджы къорды кусджытимæ рейдон мадзæлтты рæстæджы æрурæдтой автомашинæ "Toyota Mark".
"Машинæ басгæрсты рæстæджы ссардæуыд буарад, кæцы экспертизæйы хатдзæгмæ гæсгæ у наркотикон буарад – гæн, йæ уæз уыд 115 граммы", — загътой МХМ-ы.
Ведомствæйы банысан кодтой, факты фæдыл баконд кæй æрцыд уголовон хъуыддаг "Наркотикон буарæдтæ æнæзакононæй химæ дарын"-ы статьяйы фæдыл.
