ЦХИНВАЛ, 2 фев — Sputnik. Цхинвайлаг боксер Дженыкъаты Ричард рамбылдта боксæй уæрæсейаг спортивон студентон цæдисы ерыстæ, фæхъусын кодта Sputnik йæ тренер Хаситы Владислав.
"Дженыкъаты Ричард ерысты ссис фыццаг 48 кг уæзы, финалы уый ныддæрæн кодта дагъыстайнаг спортсмены. Куыд турниры уæлахиздзау, афтæ уый самал кодта йæхицæн балцæг Уæрæсейы фыццагадмæ, кæцы цæудзæн Анапайы марты кæрон", — загъта тренер.
Хаситы Владислав ма бафтыдта, ноджы ма сæ аннæ дыууæ хъомылгæнинаджы дæр æнтыстджынæй кæй сархайдтой ерысты æмæ ссисты призертæ. Бестауты Аслан райста æвзист, Ӕлборты Сослан та — бронзæ майдан. Командæ æдæппæтæй Ирыстоны хæзнадонмæ æрхаста 5 майданы. Ричардæй дарддæр ма сыгъзæрин майдан рамбылдта дзæуджыхъæуккаг боксер Гобеты Тамерлан, ноджы ма иу цæгатирыстойнаг боксер Золоты Станислав дæр райста æвзист.
Уæрæсейаг спортивон студентон цæдисы ерыстæ боксæй 13-14 азы кары фæсивæды ʻхсæн цыдысты Кæсæг–Балхъары республикæйы.
