ЦХИНВАЛ, 22 фев — Sputnik, Плиты Фатимæ. Цхинвайлаг боксертæ рамбылдтой цыппар призон бынаты Цæгат Кавказы федералон зылды ерысты, фехъусын кодта Sputnik боксы тренер Дзигойты Ацæмæз.
Цæгат Кавказы федералон зылды ерыстæ уыдысты æвзарæн этап Уæрæсейы фыццагадмæ.
"Мæ хъомылгæнинæгтæ дыууæйæ — Гæджиты Гурам æмæ Тыджыты Василий ссисты бронзæйон призертæ. Гурам кæд æрмæст æртыккаг бынатыл ацыд, уæддæр йæ тохтæ уыдысты ахадгæ æмæ йæ Цæгат Ирыстоны боксы федерацийы хистæр фæхуыдта сбортæм Анапамæ. Уым ын уыдзæн фадат Уæрæсейы фыццагадмæ балцæгыл стох кæнын", — загъта тренер.
Дзигойты Ацæмæз ма радзырдта, ерысты ма кæй расгуыхтысты æндæр цхинвайлаг тренерты хъомылгæнинæгтæ дæр.
"Цхинвайлæгты активы ма ис ноджы дыууæ æвзист майданы. Хорз тохтæ равдыста Джиоты Арсен — Кокойты Мурат æмæ Чехойты Аланы хъомылгæнинаг ссис дыккаг. Тренертæ Хаситы Владислав æмæ Гæбæраты Гамлеты хъомылгæнинаг Ӕлборты Сослан дæр рамбылдта æвзист майдан", — фехъусын кодта йæ коллегæты æнтыстытæ Ацæмæз.
Уæрæсейы фыццагад боксæй цæудзæн Анапайы уалдзæджы.
