ЦХИНВАЛ, 2 мар — Sputnik, Плиты Фатимæ. Тыбылты Алыксандры номыл Хуссар Ирыстоны паддзахадон университеты ног бæстыхайы 12 марты райдайдзæн ахуыры процесс, фехъусын кодта Sputnik ахуырадон уагдоны ректор Тедеты Вадим.
Хуссар Ирыстоны университеты æрбакæныны бон нысан уыд 2017 азы октябрьмæ. Уæд фæнд кодтой ног бæстыхайы æрбаконд æмæ ахуырдон уагдоны бындурæвæрды 85-азы юбилей иумæ банысан кæнын, фæлæ арæзтадон куыстытæ фæфæстиат сты.
"Ныридæгæн кусæм бæстыхаймæ ифтонгад бахæссыныл. Паддзахадон университеты ног агъуысты ахуыры процесс райдайдзæн 12 марты. Фæстæдæрмæ снысан кæндзыстæм цытджын æрбаконд", — загъгъта ректор Тедеты Вадим.
ХИПУ-ы сæйраг бæстыхай басыгъд 2008 азы августы гуырдзиаг-ирон хæсты рæстæджы. Университеты ног корпусы арæзтад хаст æрцыд 2015-2017 æзты Инвестицион программæмæ. Арæзтадон куыстытæм бавнæлдтой 2016 азы майы, бæстыхай амад æрцыд йæ раздæры бынаты Мæскуыйаг уынгыл.
