ЦХИНВАЛ, 12 мар — Sputnik, Плиты Фатимæ. Цхинвалы спорты галуан "Олимп"-ы 10-11 марты ацыдысты ерыстæ æрыгон боксерты ʻхсæн. Тыхджындæрты рабæрæг кодтой цыппор категорийы, цыппар боксеры лæвæрд æрцыдысты сæрмагонд призтæй. Турниры фæлгæтты хуыздæр хатдзæгтæ кæй спортсментæ равдыстой, уыцы тренертæ хицæн æрцыдысты бузныджы гæххæттытæй.
Ерысты æдæппæтæй архайдтой 90 спортсменæй фылдæр, уыдон ʻхсæн уыдысты куыд æхсæнадæмон ерысты уæлахиздзаутæ æмæ призертæ, афтæ ма турнирты фыццаг хатт чи архайы, ахæм лæппутæ дæр. Галуаны кæсæн зал уыд йедзаг, фæсивæды хылтæм сæ цæст дардтой сæ хæлæрттæ, хиуæттæ æмæ боксуарзджытæ.
"Ӕхсæз тыхджындæр боксеры ныридæгæн сты ахуыргæнæн сборты Анапæйы, уыдон ахызтысты бæрзонддæр æмвæзадмæ – Уæрæсейы фыццагадмæ. Республикæйы фыццагад та у фæлварæн, æхсæнадæмон ерыстæм чи нæ афты, уыдонæн. Цыппар кары къорд стох кодтой турниры, уыдон дих сты дæс уæзы категоритыл. Спортсментæй дарддæр ма ерысты фенæм, сæ хъомлыгæнинæгты æнтыстытæм гæсгæ, секциты æмæ тренерты куыст, уыдон дæр рахицæн кæнæм бузныджы гæххæттытæй", — загъта спорты комитеты хистæр.
Спорты комитеты сæргълæууæг ма ныфс бавæрдта, ахæм ерыстæ кæй фæнд кæнынц уадзын аз дыууæ хатты.
"Мидæггагон турниртæ дæр сты æнæмæнгхъæуæг боксертæ схъомыл кæнынæн. Фæззæджы та сæ æрхондзыстæм фæстæмæ ерыстæм, цæмæй æрыгон фæлтæрты разæнгард кæнæм ног æнтыстытæм æмæ уæлахизтæм", — бафтыдта уый.
