ЦХИНВАЛ, 12 мар — Sputnik, Козаты Диана. Хуссар Ирыстоны зындгонд журналист æмæ экскурситæуадзæг Карсанты Гурамы машинæ басыгъд ивгъуыд къуыри. Гурам йæ "Лада-Калина"-йыл сæдæгай туристтимæ æрзылд æнæхъæн республикæйыл, Ирыстоны историйыл дзургæйæ æмæ сын алæмæттаг къуымтæ æвдисгæйæ.
"Райстæуыд фæндон Гурамæн УАЗ "Патриот" балхæнын! Кæд дæ, Гурам, ахæм машинæ хъæуы, уæд!", — ныффыста президент комментарийты социалон хызæг Facebook-ы.
Гурам йæхæдæг дзуры, æхæм азæлд æнхъæл кæй нæ уыд йе ′мгæрттæ æмæ æнæзонгæ адæмæй. Социалон хызæгты æвиппайды бакодтой акци ахæм хэштегимæ — #поможем гиду (баххуыс кæнæм гидæн).
"Комментатортæй чидæр бахаста фæндон мæнæн УАЗ "Патриот" балхæнын, кæцыйæн президент, йæхæдæг Facebook-ы активон пайдагæнæг, æвиппайды радта дзуапп. Ӕз æнхъæлдтон, уый цавæрдæр хайад кæй райсдзæн акцийы, фæлæ æнхъæл нæ уыдтæн æмæ президент йæхæдæг æнæхъæнæй аскъуыддзаг кæндзæн проблемæ", — загъта Карсанты Гурам.
Уый загъта бузныг Бибылты Анатолий æмæ республикæйы алы цæрæгæн дæр, кæцытæ балæууыдысты йæ фарсмæ.
