ЦХИНВАЛ, 16 мар — Sputnik, Плиты Фатимæ. Цхинвалы концерт "Мы — за Путина"–йы рæстæджы зынгæ ирон политиктæ æмæ номдзыд спортсментæ æрсидтысты æвзæрстыты Уæрæсейы президенты бынатмæ кандидат Владимир Путины фарсмæ балæууын æмæ Стыр Уæрæсейæн тыхджын президент равзарын.
Концерт сарæзта фæсивæдон организаци "Иугонд Алани". ПККЗ "Чермен"-ы адæмæй азмæлæн дæр нæ уыд, æгæрыстæмæй дзы лæууæн бынæттæ дæр нал уыд, бирæтæ сæ хуынды гæххæтытимæ дæр аззадысты лæугæйæ.
Уæрæсейы президенты бынатмæ кандидат Владимир Путины цытæн концерт хъавыдысты ауадзын дыууæ бон раздæр, фæлæ трагикон цау ахаста æвзонг курдиатджын зарæггæнæг Цхуырбаты Сæрмæты цард, уый аххосагæй йæ рахастой 15 мартмæ. Æрæмбырдуæвджытæ иу уысм æдзæмæй алæугæйæ ссардтой æвзонг лæппуйы рухс ном. Уый фæстæ концерт æрбакодта Хуссар Ирыстоны сгуыхт артисткæ Хадыкъаты Алла. Ныхасы рацыд президент Бибылты Анатолий дæр. Паддзахады сæргълæууæг банысан кодта, Хуссар Ирыстоны кæй нæ рох кæнынц Уæрæсейы президент Владимр Путины лæггæдтæ.
"Мах цæмæн стæм Путины æвварс? Мах нæ ферох сты 2008 азы хæстон архайдтытæ. УФ хицауады сæрдар Владимир Путин Китайы олимпиаг хъæзтытæй комкоммæ куы ратахт Дзæуджыхъæумæ, цæмæй йæхи цæстæй фена нæ лигъдæтты уавæр. Йæ хъусдарды бын сты Хуссар Ирыстоны проблемæтæ æппынæдзух. Ӕппынфæстаг, мах хъæуы тыхджын Уæрæсе фидар президентимæ", — загъта Бибылты Анатолий.
Концертон программæйы номырты æхсæнты сценæйыл æвзæрстыты хайад райсынмæ æрсидтысты æртæ хатты олимпиаг чемпион, Уæрæсейы Паддзахадон Думæйы фæсивæдон политикæйы фæдыл комитеты хистæры хæдивæг Таймæзты Артур, олимпиаг чемпион Хуыгаты Алан, дунейон чемпион Дыгъуызты Малхаз æмæ æндæртæ.
"Уазалзæрдæ ахаст æвзæрстытæм ис фæсивæдæн, уымæ гæсгæ уыдонмæ уæлдай сидын æвзæрстыты хайад райсынмæ, æз мæхæдæг та схъæлæс кæндзæн УФ-йы тыхджын президентæн", — загъта уый.
Концерты рæстæджы залы айзæлд Бекъойты Ванойы зæрæджы премьерæ "Стряхните пыль с черкесок, Осетины!". Сценæйыл сæ арæхстдзинад æвдыстой æхсæнадæмон конкурсты лауреаттæ – хоры æмæ кафты къордтæ æмæ зарæггæнджытæ, стæй ма гимнасткатæ.
