ЦХИНВАЛ, 20 мар — Sputnik, Плиты Фатимæ. Цхинвалы администраци хоны республикæйы спортсменты фыццаг ерыстæм цыбыр нардитæй, фехъусын кодтой Sputnik горæты администрацийы пресс-службæйы.
"Фыццаг хатт Хуссар Иры цæуы ацы турнир, хайад райсын сæ бон у спортсментæн республикæйы æппæт къуымтæй. Ӕгæрыстæмæй ма нæм телефонæй дзурынц Дзæуджыхъæуæй дæр, уыдон дæр фæнды æрцæуын ерыстæм. Хуынд цæуынц 18 азæй уæлæмæ нардийæхъазджытæ. Финал цæудзæн ПТРК "Ир"-ы комкоммæ эфиры", — хъусын кæны пресс-службæ горæты администрацийы культурæ æмæ спорты хайады хистæр Тасойты Игоры ныхæстæ.
Ерыстæ ацæудзысты 7 апрелы Профцæдисты бæстыхайы. Мэрияйы ма банысан кодтой, сæ нывæзты ма кæй ис цыбыр нардитæй Супер кубок ауадзын дæр.
