ЦХИНВАЛ, 21 мар — Sputnik. Цæгат Ирыстоны столицæйы сарæзтой хатдзæгтæ горæты æхсæнадæмон территориты хæрзарæзтады проектты фæдыл адæмон референдумæн, хъусын кæны Дзæуджыхъæуы бынæттон хиуынаффæйады администраци.
Дзæуджыхъæуы цæрджытæ æвзæрстой, горæты фыццаджыдæр цы фæлладуадзæн бынат цалцæггонд хъуамæ æрцæуа, уый. Æвзаргæ та кодтой дыууæ бынаты æхсæн – Централон парк æмæ Терчы былгæрон. Æвзарæн къамисы минæвæрттæ куыд зæгъынц, афтæмæй хъæлæс кæнынмæ æрбацыд 136 мин адæймаджы, уыдонæн сæ фылдæр хай (52,96%) схъæлæс кодтой Хетæгкаты Къостайы номыл централон парчы реконсрукцийæн.
Цалцæггæнæн куыстытæ цæудзысты æнцонвадат цардыуаджы федералон проекты фæлгæтты. Райдайдзысты ацы аз. Проекты дизайн та арæзт æрцæудзæн æввахсдæр рæстæджы.
