ЦХИНВАЛ, 17 апр — Sputnik. Хуссар Ирыстоны рауагъдон бал ацæудзæн 23 июны 20 июны бæсты, уымæн æмæ уыцы бон баст у Хуссар Ирыстоны историйы трагикон цаутæй иуимæ – 1920 азы 20 июны Гуырдзыстоны æфсад амардта 13 коммунары.
"Мах хъавыдыстæм бал ауадзын 20 июны, фæлæ уый Хуссар Ирыстоны историйы трагикон датæ кæй у, уый хынцгæйæ, хуыздæрыл нымайæм бал ахæссын 23 июньмæ", — загъта ахуырады министр президентимæ фембæлды рæстæджы, хъусын кæны йæ пресс-службæ.
Министр ма фехъусын кодта, рауагъдонтæн фæстаг дзæнгæрæг кæй айзæлдзæн 26 майы. Уымæй дарддæр ма, министр паддзахады сæргълæууæджы базонгæ кодта ахуыры азы хатдзæгтимæ.
"Скъолаты ис 6256 ахуырдзауы, уыдонæй ахуыр фæразынц 6126. Рауагъдонты нымæц æнæпаддзахадон скъолатимæ иумæ сты 465, ивгъуыд азы уыдысты — 431", — загъта уый.
Ахуырады министр ма радзырдта президентæн, ацы аз скъолаты кæй уыдзæн 6 рауагъдон фæлварæны. Ӕнæмæнг фæлварæнты ʻхсæн уыдзысты уырыссаг æвзаг æмæ литературæ, математикæ, ирон æвзаг.
"Аннæ дыууæ фæлварæн скъоладзаутæ æвзарынц сæхæдæг", — бамбарын кодта уый.
Хуссар Ирыстоны 20 июны у Фыдохы бон —1920 азы ацы бон гуырдзиаг меньшевиктæ амардтой амынæттаг 13 коммунары. Уый хæдразмæ Гуырдзыйы æфсад æрабабырстой Хуссар Ирыстонмæ, ацы цаутæй райдыдта ирон адæмы фыццаг геноцид.
