ЦХИНВАЛ, 27 апр — Sputnik, Плиты Фатимæ. Культурæйы министрады адæмон сфæлдыстады центр сиды хæдахуыр къамисджытæм цыппæрæм æрвылазон конкурс "Южная Осетия —2018"-мæ. Куыстытæ ист цæудзысты суанг 18 майы онг, фехъусын кодта Sputnik центры пресс-секретарь Къæбысты Зæринæ.
Конкурс цæуы æхсæз номинацийы – "пейзаж", "хуызист", "Цхинвал абон", "цыртдзæвæнтæ", "Хуссар Иры фенддаг бынæттæ", "райгуырæн бæстæйы флора æмæ фауна".
"Фотоконкурсы хатдзæгтæм гæсгæ Къостайы цырты цур Цхинвалы ацæудзæн куыстыты равдыст "Остановись, мгновение, ты родное". Гом арвы бын равдыст нывонд уыдзæн бæрæгбонон датæйæн —Хæдбардзинады акт райсыны бонæн. Мадзалы фæлгæтты хорзæхджын æрцæудзысты æнтыстджындæр къамисджытæ дæр", — банысан кодта Къæбысты Зæринæ.
Адæмон сфæлдыстады центр фотоконкурс уадзы ныр цыппæрæм хатт. Фыццаг сæ тыхтæ бафæлвæрдтой 2014 азы. Хицæн æзты конкурсы расгуыхтысты къамисджытæ Гæбæраты Нелли, Габайты Владимир, Хуыгаты Ростислав, Гæззаты Тимур æмæ æндæртæ.
