ЦХИНВАЛ, 28 апр — Sputnik, Уалыты Диана. Ирон режиссер Дыгъуызты Аланы цыбырметражон киноныв "Бача" райста жюрийы сӕрмагонд приз детективон кинонывты ӕмӕ барадхъахъхъӕнӕг телепрограммӕты ӕхсӕнадӕмон фестивалы. Уый тыххӕй кинонывы саразӕг фехъусын кодта социалон хызӕг Facebook-ы йӕ фарсыл.
"Бача" ацы хатт та хорзӕх райста "Детективон киноныв" номинацийы.
Киноныв "Бача" арӕзт у реалон цауты бындурыл ӕмӕ дзуры гыццыл адӕймагыл зын хъысмӕтимӕ. Ацы приз кинонывы фыццаг хорзӕх нӕу — фарон та йӕ банысан кодтой Æппӕтуӕрӕсейон кинофестивалы сӕрмагонд хорзӕхӕй.
Режиссер ӕмӕ киностуди FARN MOVIE-йы, кӕцы систа ацы ныв, ӕвӕрӕн къоппы ис бирае кинонывтӕ, кӕцытӕ райстой хорзӕхтӕ ӕппӕтуӕрӕсейон ӕмӕ ӕхсӕнадӕмон фестивалты. 2016 азы киноныв "Хуыцаубон" райста иууыл бӕрзонд хорзӕх Чехийы кинофестивалы режиссурайы тыххӕй, афтӕ ма йӕ банысан кодтой жюрийы специалон хорзӕхӕй "Золотой Феникс"-ы.
Æнӕхъӕнметражон киноныв "Соврешь-умрешь" та райста меценат Мария Тенишовайы специалон приз.
