ЦХИНВАЛ, 10 май — Sputnik. Цæгат Ирыстоны Национ музейы байгом равдыст "Ма нын æфсæрмы кæнут нæ цæсгæмттæй", кæцы нывонд у Ирыстонæй немыцы уацары чи бахауд, уыдоны кадæн.
Равдыстæн къамтæ æмæ иннæ æрмæджытæ æмбырд кодтой цыппар азы дæргъы.
"Равдысты фенæн ис немыцаг концлагерты регистрацион гæххæттытæй къамтæ æмæ портреттæ, стæй нырмæ кæй никуы ма равдыстой, ахæм къамтæ уацайрæгты цардæй. Раздæр сын нæ хъæр кодтой сæ нæмттæ. Сæ кой кæнынæй дæр æфсæрмы кодтой. Ныр ацы равдыстæй базонæн ис уыцы уæззау цауы бахауæг адæмы хъизæмæрттæ æмæ мæлæты хабæрттæ, — дзырдæуы хъусинаджы.
Мадзал аразджыты ныхæстæм гæсгæ, ацы равдыст чи фена, уыдон æнæбанкъаргæ нæ фæуыдзысты Цæгат Ирыстоны хъæбулты зындзинæдтæ уацары бахаугæйæ.
Цæгат Ирыстоны республикæйы 600 цæрæгæй фылдæр сæхиуыл банкъардтой уыцы немыцæгты арæзт лагерты тыхст цард.
Равдыст сарæзтой Цæгат Ирыстоны Национ музейы æмæ республикæйы къамты музейы кусджытæ.
