ЦХИНВАЛ, 23 май — Sputnik. Ӕлборты Феликсы номыл Паддзахадон музыкалон ахуыргӕнӕндоны уагъд ӕрцыд радон хыгъдон концерт, цы ран хайад райстой алыгъуызон хайӕдты студенттӕ ӕмӕ ахуыргӕнджытӕ. Мадзал бакодта академикон зарджыты къорд хормейстр Хъуылымбегты Иринайы сӕргълӕудӕй, фӕстӕдӕр ӕм ӕрбаиу ис солист Гасситы Ацӕмӕз дӕр.
Сценӕйыл ма ралӕууыд адӕмон инструментты оркестр Куымӕриттаты Тинайы сӕргълӕудӕй, националон инструментты къорд Къӕбысты Сӕрмӕты сӕргълӕудӕй ӕмӕ кафты къорд Тедеты Ацӕмӕзы сӕргълӕудӕй. Ӕвзонг студенттӕ концерты рӕстӕджы равдыстой сӕ курдиат.
Мадзалмӕ ӕрбацыдис Хуссар Ирыстоны президент Бибылты Анатолий ӕмӕ хицауады кусджытӕ. Паддзахады сӕргълӕууӕг загъта бузныджы ныхӕстӕ музыканттӕн сӕ профессионалон хъазты тыххӕй концерты.
"Нӕ зӕрдӕтӕ нын радон хатт барухс кодта музыкалон ахуыргӕнӕндон, ногӕй нын ахӕм диссаджы изӕр кӕй балӕвар кодта, уый тыххӕй. Кӕй зӕгъын ӕй хъӕуы, уый у музыкалон ахуыргӕнӕндоны директор Гӕджиты Жанна, ахуыргӕнджытӕ ӕмӕ студентты фӕрцы", — загъта президент.
Ахуыргӕнӕндоны директор Гӕджиты Жанна загъта бузныджы ныхӕстӕ йӕ коллективӕн куыстмӕ бӕрнон ахасты тыххӕй.
"Мах алыхатт дӕр цӕттӕ стӕм лӕвар кӕнын сымахӕн музыкӕйы рӕсугъддзинад ӕмӕ лӕггад кӕнын нӕ чысыл Ирыстоны сӕраппонд", — бафтыдта Гӕджиты Жанна.
