ЦХИНВАЛ, 26 июн — Sputnik. Цӕгат Ирыстоны уагъд ӕрцыд фестиваль "Нæртон хъæзтытӕ". Фат æмæ æрдынæй æхст, рæттыл хъæбысхæст, дурæппæрст æмӕ афтӕ дарддӕр — Горæтгæроны районы Октябрьскæйы хъæуы алкæмæн дæр уыд "Нæртон хъæзтыты" йæ бæгъатырдзинад равдисыны фадат, хъусын кӕны 15 регион.
"Нæртон хъæзтытæ тынг зæрдæмæдзæугæ æмæ цымыдисаг сты. Фæсивæд разæнгардæй архайы. Сӕ курдиæттæ бирæтæ балæвæрдтой, æмæ уый тынг æхсызгон у. Мадзалы нысан у фæсивæды 'хсæн иудзинад парахат кæнын, цæмæй сæ фыдæлтау тыхджын уой. Фæсивæды Боны размæ сын арфæ кæнæм, нæ зæрдæ сын зæгъы амонд, æнæниздзинад æмæ æнтыстытæ!" — бахахх кодта республикæйы фæсивæды хъуыддæгты комитеты сæрдар Джусойты Руслан.
Хъæзтыты архайыны бар уыд республикæйы æппæт цæрджытæн — 18 азæй уæлæмæ. Фестивалы программæ уыд алыгъуызон: уæззæуттæ исынæй "фермеры тезгъо"-йы онг — уæхсчытыл 100 кг уæзимæ.
Ерысты уæлахиздзаутæ æмæ призертæ хорзæхджын æрцыдысты кубоктæй, майдантæй æмæ кады гæххæттытæй. Мадзал бацæттæ кодтой Цæгат Ирыстоны фæсивæды хъуыддæгты комитет, Горæтгæрон районы бынæттон хиуынаффæйады администрацийы фæсивæды хъуыддæгтæ, физикон культурæ æмæ спорты хайад æмæ "Фæсивæды социализацийы центр".
