ЦХИНВАЛ, 17 июл — Sputnik. Хуссар Ирыстоны президент Бибылты Анатолий ӕмӕ Цӕгат Кавказы хъуыддӕгты фӕдыл уӕрӕсейаг министр Сергей Чеботарев бабӕрӕг кодтой уазӕгдон "Ирыстон" ӕмӕ Хетӕгкаты Къостайы номыл паддзахадон драмон театры арӕзтадон куыстытӕ.
Чеботарев ӕрцыд Хуссар Ирыстонмӕ кусӕгон балцы. Цхинвалы уый фембӕлд республикӕйы президентимӕ ӕмӕ хайад райста хицауады рабадты, кӕцыйы рӕстӕджы дзырдтой 2018-2019 ӕзты Инвестпрограммӕйы реализацийыл.
Цӕгатирыстойнаг инвестор Бердиаты Вадим радзырдта инспекцийы хайадисджытӕн, зӕгъгӕ, уазӕгдоны арӕзтады темптӕ чысыл фӕфӕстиат сты, арӕзтады къуындӕг фӕзуаты тыххӕй. Инвестор ныфс бавӕрдта, зӕгъгӕ, проблемӕ аскъуыддзаг кӕндзысты ӕввахс рӕстӕджы, объект та эксплуатацимӕ ратдзысты 2019 азы кӕрӕтты.
Афтӕ ма Бердиаты Вадим фехъусын кодта президент ӕмӕ Кавказы хъуыддӕгты фӕдыл министрӕн, финансон фӕрӕзтӕ кӕй цӕуынц рӕстӕгыл ӕмӕ фидарӕй загъта, сӕрдыгон куысты бӕрцуатӕн дӕр рӕстӕгыл кӕй ратдзысты аванс.
Афтӕ ма Бибылты Анатолий ӕмӕ Сергей Чеботарев бабӕрӕг кодтой театры агъуыст. Объекты куысты темптӕ ӕмӕ йӕ эксплуатацимӕ раттыны тыххӕй радзырдта нардуатон организаци "Эверест"-ы минӕвар Руслан Файтыхов.
