ЦХИНВАЛ, 26 июл — Sputnik, Плиты Фатимæ. Хуссар Ирыстоны националон киностуди "Allonfilm" хоны сфæлдыстадон къорды дыууæ документалон куысты премьерон равдысттæм. Кинонывтæ "Фарастæй иумæ" æмæ "Пари со смертью" равдисдзысты 6 августы ПККЗ "Чермен"-ы, фехъусын кодта Sputnik киностудийы директор Мамиты Григорий.
Киностудийы фыццаг фильм "Пари со смертью"-йæн ацыд презентаци Sputnik Хуссар Ирыстоны фæзуатыл, уый фæстæ Севастополы æхсæнадæмон фестивалы бацыд хуыздæр кинонывты нымæцмæ. Дыккаг киноныв "Фарастæй иумæ" адæмы размæ рахæсдзысты фыццаг хатт.
"6 августмæ нысан æрцыдысты дыууæ кинонывы гом равдысттæ. Изæры авд сахатыл ПККЗ "Чермен"-ы ацæудзæн киностудийы фыццаг куыст "Пари со смертью"-ы равдыст, уый фæстæ та йæ адарддæр кæндзæн нæ документалон фильм "Фарастæй иумæ", — загъта Мамиты Григорий.
Уый ма банысан кодта, равдысттæ арæзт цæуынц фæсивæдон организаци "Иугонд Алани"-йы æмархайдæй.
Фыццаг киноныв ист у Паддзахадон ӕдасдзинады раздӕры ӕнӕштатон кусӕг, паддзахадон хорзӕхты кавалер Колыты Иналы уæззау хъысмæтыл. Уый Хуссар Иры ПӔК-ы амындмӕ гӕсгӕ сразы ис Гуырдзыстоны сӕрмагонд службӕты ӕмгуыстады ӕнхъарӕныл. Уый бахызта Цхинвалы цалдӕр терактӕй, фӕлӕ йын уӕддӕр фӕстагмӕ йӕхи фыдбылызӕй бахизын нал бантыст. Гуырдзыстоны террористон фӕндтӕ раргом кӕныны тыххӕй сӕ сæрмагонд службæтæ спырх кодтой Иналы хӕдтулгӕ 2008 азы марты. Ӕвзонг лæппу террористон акты фæстиуæгæн фесæфта йæ дыууæ къахы дæр, райста уæззау цæфтæ.
Документалон фильм "Фарастæй иумæ" таурæгъ кæны Хъахъхъæнынады министрады разæсгарæн къорды разамонæг Багаты Амиран æмæ йе 'мтохгæнæг ирон лæппуты хъайтардзинадыл, кæцытæ 2008 азы хæсты Уырысы æххуысы ʻрцыдмæ урæдтой хотыхджын æнæкæрон гуырдзиаг æфсады. Амиран æмæ йæ æмкусæг Джиоты Азæмæт ацы æнæмсæр тохы фæмард сты.
