ЦХИНВАЛ, 26 июл — Sputnik. Хуссарирыстойнаг республикӕйы сӕргълӕууӕг Бибылты Анатолий радзырдта сириаг амалиуӕггӕнджытимӕ ӕмгуыстады фадатыл, кӕцы банысан кодтой йӕ баныхасы рӕстӕджы Башар Асад ӕмӕ премьер-министр Имад Хамисимӕ. Фембӕлды хайад райстой сӕдӕ бизнесменӕй фылдӕр, афтӕ ма Сириаг Арабаг Республикӕйы (САР) экономикӕ ӕмӕ базарады министр Самир Халил ӕмӕ базарадон-сӕудӕджерадон палатӕты сӕргълӕуджытӕ, хъусын кӕны РХИ президенты пресс-службӕ.
"Мах ӕрдзырдтам ӕмгуыстадыл экономикӕйы, иумӕйаг амалиуӕгадты сарӕзтад, базарад ӕмӕ банкон фадыджы ӕмгуыстады перспективӕтыл. Хъуыды кӕнын ӕмӕ экономикон ахастыты райрӕзты сӕйраг фӕлгонц хъуамӕ уа бизнесментӕн, экономикӕйы министрад ӕмӕ базарадон-сӕудӕджерадон палатӕты ӕххуысӕй", — загъта Бибылты Анатолий.
Дыууӕ бӕстӕйы ӕмгуыстады пайдадзинад бахахх кодта экономикӕйы министр Самир Халил дӕр.
"Хуссар Ирыстон гӕнӕн ис бакӕна Сирийӕн бӕстӕтӕм дуӕрттӕ, кӕцытимӕ йын ис хорз ахастытӕ, Сири та бакӕндзӕн Хуссар Ирыстонӕн арабаг бӕстӕтӕм. Уый нын байгом кӕндзӕн егъау перспективӕтӕ", — банысан кодта уый.
Хуссар Ирыстоны президент радзырдта бизнесментӕн, бӕстӕты ӕхсӕн ӕмгуыстад ӕмӕ хӕлардзинады фӕдыл Бадзырд кӕй дӕтты фадат ӕнӕвизон режимӕн. Базарадон-экономикон ӕмгуыстады фӕдыл Бадзырд та фӕкъаддӕр кӕндзӕн налогтӕ.
Фембӕлды фӕстиуӕгӕн фӕнд кӕнынц бакӕнын дыууӕ центр Дамаск ӕмӕ Цхинвалы. Хуссар Ирыстоны делегаци президенты сӕргълӕудӕй ис Сирийы официалон балцы. Делегацийы сконды сты президенты администрацийы разамонӕг Козаты Игорь, Фӕсарӕйнаг хъуыддӕгты министр Медойты Дмитрий, хъахъхъӕнынады министр Гассеты Ибрагим, экономикон райрӕзты министр Кокойты Геннадий, Уӕлвӕткон уавӕрты министр Тадтаты Алан.
