ЦХИНВАЛ, 25 авг — Sputnik. Цхинвалы бирӕфатерон хӕдзары зынгирвӕзт аиуварс кодтой майрӕмбоны ӕхсӕвы, фехъусын кодта Хуссар Ирыстоны Уӕлвӕткон уавӕрты министрады (УУМ) пресс-службӕ.
Зынгирвӕзт фӕзынд дыууӕуӕладзыгон хӕдзары Коцойты Арсены уынгыл. Зынгирвӕзты тыххӕй хъусинаг ӕрбацыд УУМ-мӕ 22.35 сахатыл. Цалдӕр минуты фӕстӕ цауы бынатмӕ ӕрбацыдысты зынгфӕдисон хӕдтулгӕтӕ.
"Зынгирвӕзты фӕзуат уыд 120 квадратон метр. Артимӕ тохы хайад истой цыппар зынгфӕдисон хӕдтулгӕйы. Коцойты Арсены уынгыл цӕуынц цалцӕггӕнӕн куыстытӕ ӕмӕ уый бахъыгдардта хӕдтулгӕты. Ӕнӕхъӕнӕй арт ахуыссын кодтой сахат ӕмӕ ӕрдӕгмӕ. Басыгъд хӕдзары дыккаг уӕладзыг", — банысан кодтой УУМ-ы.
Уагдоны бафтыдтой, зӕгъгӕ, зынгирвӕзты фӕстиуӕгӕн зианбаййафджытӕ нӕй. Зынгирвӕзты аххосӕгтӕ бӕрӕг кӕнынц.
