ЦХИНВАЛ, 29 авг — Sputnik, Козаты Диана. Хуссар Ирыстоны цыппӕрӕмы электроэнерги ахицӕн кӕндзысты иу бонмӕ, фехъусын кодта Sputnik Паддзахадон унитарон куыстуат "Энергоресурс"-ы генералон директор Гӕбӕраты Алан.
Йӕ ныхӕстӕм гӕсгӕ, рухc ахицӕн кӕндзысты Цӕгаттаг порталы ног дӕлстанц баиу кӕныны тыххӕй.
"Ручы тоннелы Цӕгаттаг порталы кӕронмӕ бахӕццӕ сты дӕлстанцы цалцӕггӕнӕн куыстытӕ. Цыппӕрӕмы объект баиу кӕндзысты, уый тыххӕй хъӕуы рӕстӕгмӕ ахицӕн кӕнын электроэнерги. Рухс нӕ уыдзӕн 9.00-ӕй 19.00 сахатмӕ", — загъта Гӕбӕраты Алан.
Йӕ ныхӕстӕм гӕсгӕ, хуссарирыстойнаг энергетиктӕ спайда кӕндзысты ацы рӕстӕгӕй ӕмӕ сӕххӕст кӕндзысты сӕ куыстытӕ, цӕмӕй республикӕйы ӕндӕр хатт рухс мауал ахицӕн кӕной.
