ЦХИНВАЛ, 6 сен — Sputnik. Цхинвалы гарнизоны ӕфсӕдтӕ райдыдтой цӕттӕ кӕнын Республикӕйы боны цытӕн парадмӕ, кӕцы нысан кӕнынц 20 сентябры, хъусын кӕны Хуссар Ирыстоны хъахъхъӕнынадон уагдоны пресс-службӕ.
Бӕрӕгбонон маршы репетицитӕ цӕуынц 4-ӕм уӕрӕсейаг ӕфсӕддон базӕйы плацыл.
"Парадмӕ цӕттӕкӕнынад ӕххӕст цӕуы РХИ хъахъхъӕнынады министр инӕлар-майор Гассеты Ибрагимы уынаффӕмӕ гӕсгӕ. Ахуырты хайад исынц хъахъхъӕнынады министрад, Мидхъуыддӕгты министрад (МХМ), Уӕлвӕткон уавӕрты министрад (УУМ), РХИ Паддзахадон ӕдасдзинады комитеты (ПӔК) арӕнгӕрон службӕ ӕмӕ 4-ӕм ӕфсӕддон базӕйы хайадтӕ. Афтӕ ма репетициты хайад исынц Мидхъуыддӕгты ӕмӕ Хъахъхъӕнынады министрадты кусӕг сылгоймӕгтӕ ӕмӕ кадеттӕ", — дзырдӕуы хъусинаджы.
Цӕттӕкӕнынадӕн къухдариуӕгад кӕны РХИ Хотыхджын тыхты генералон штабы хистӕр, булкъон Виктор Федоров. Парад, кӕцы ацӕудзӕн Цхинвалы центры 20 сентябры, райсдзӕн хъахъхъӕнынады министр Гассеты Ибрагим.
