ЦХИНВАЛ, 13 сен — Sputnik. Цхинвалы зынгирвӕзты зианбаййафджытӕй иуы аластой Хуссар Ирыстоны территорийӕ ӕндӕр рынчындонмӕ, йӕ уавӕр у уӕззау, фехъусын кодтой республикон соматикон рынчындоны.
Зынгирвӕзт ӕрцыд ӕмдзӕрӕндоны агъуысты Кочысаты Розайы уынгыл ӕртыццӕджы 16:30 сахатыл. Зынгирвӕзты аххосаг уыд газы баллоны фехӕлд. Цауы фӕстиуӕгӕн зиан баййӕфтой фатертӕй иуы цӕрӕг хо ӕмӕ ӕфсымӕр — Цхинвалы 31 ӕмӕ 18 аздзыд цӕрджытӕ.
"Нӕлгоймагӕн йӕ буар 60 процент басыгъд, йӕ уавӕр у уӕззау ӕмӕ йӕ аластой республикӕйы территорийӕ, цӕмӕй йын экстренон ӕххуыс бакӕной", — радзырдтой уагдоны.
Йӕ хо дӕр бахаудта рынчындонмӕ буары сыгъдимӕ, фӕстӕдӕр йӕ уавӕр февзӕрдӕр ис — ӕвӕццӕгӕн, газы хъӕстӕйы фӕстиуджыты тыххӕй.
