ЦХИНВАЛ, 13 сен — Sputnik. Хуссар Ирыстоны президент Бибылты Анатолий цыппӕрӕмы ссӕрибар кодта йӕ бынатӕй республикӕйы Паддзахадон ӕдасдзинады комитеты (ПӔК) сӕргълӕууӕг Михаил Шабановы, дзырдӕуы паддзахады сӕргълӕууӕджы указы.
"Ссӕрибар кӕнын йӕ бынатӕй Республикӕ Хуссар Ирыстоны Паддзахадон ӕдасдзинады комитеты сӕргълӕууӕг Шабанов Михаил Виталийы фырты", — дзырдӕуы президенты указы.
Уыцы бон ма президент бафыста ноджы иу указ, цӕмӕй сӕвӕра ПӔК сӕргълӕууӕджы хӕстӕ ӕххӕстгӕнӕгӕй уагдоны сӕргълӕууӕджы хӕдивӕг Хуыбиаты Владимиры.
Шабановы снысан кодтой ПӔК сӕргълӕууӕгӕй 2017 азы июлы. Уый раивта уыцы бынаты Виктор Шаргаевы.
