ЦХИНВАЛ, 14 сен — Sputnik, Плиты Фатимæ. Хуссарирыстойнаг дизайнер Бекъойты Хох бавдисдзæн йæ коллекци "Дыккаг уарзт" Дзæуджыхъæуы модæйы фестивалы. Равдысттæ цæудзысты горæты бæрæгбонон мадзæлтты фæлгæтты.
Бекъойты Хох ивгъуыд аз Дзæуджыхъæуы горæты бæрæгбоны равдыста йæ аннæ коллекци "Наваждение".
"Дзæуджыхъæуы горæты бæрæгбоны рæстæджы уагъд цæуæг модæйы фестивалы бавдисынц дизайнертæ сæ коллекцитæ. Ам фенæн вæййы сабийы дарæс, националон дзаума æмæ æвзонг дизайнерты куыстытæ. Фарон фыццаг хатт архайдтон мадзалы, уæд равдыстон коллекци "Наваждение". Ныр та æхсæнады размæ рахæсдзынæн "Дыккаг уарзт"-æй 15 "look", — загъта Sputnik йæхæдæг дизайнер.
Хуыцаубоны Цæгат Ирыстоны банысан кæндзысты сæйраг горæты æмæ Республикæйы бон. Гуырахстджын мадзæлттæ ацæудзысты Дзæуджыхъæуы дыууæ бынаты — Терчы был æмæ Сабырады проспектыл.
