ЦХИНВАЛ, 18 сен — Sputnik, Плиты Фатимæ. Хуссар Ирыстоны культурæйы министрады дæлбар Адæмон сфæлдыстады центр Республикæйы бæрæгбонмæ æрбакæндзæн æрмдæсныты III армукъа-равдыст "Сæндидзæн", фехъусын кодта Sputnik центры пресс-секретарь Къæбысты Зæринæ.
Хуссар Иры æрмдæсныты куыстытæ фенæн æмæ балхæнæн уыдзæн 20 сентябры Хетæгкаты Къостайы цыртрæбын Цхинвалы.
"Куырдиæттæ райстам 19 адæймагæй — сæ куыстытæ бавдыстой куыд карджын адæймæгтæ, афтæ скъоладзаутæ дæр. Уыдон архайынц аивады хицæн здæхæнты – национ хъазæнтæ, хъæдырмæгæй мигæнæнтæ аразын, бийын, хуыйын æмæ æндæр фадгуыты. Къостайы цыртрæбын алкæцы адæймагæн дæр уыдзæн йæхи сæрмагонд фынг йæ куыстытимæ", — загъта Къæбысты Заринæ.
Уый ма бафтыдта, армукъа-равдыст кæй адарддæр кæндзæн "Ирон хъазт".
